MUSLIM360

شروع الله کے نام سے جو بڑا مہربان نہایت رحم والا ہے

(اے پیغمبر) اپنے پروردگار جلیل الشان کے نام کی تسبیح کرو ‏﴿ 1﴾ ‏ جس نے (انسان کو) بنایا پھر (اس کے اعضاء کو) درست کیا ‏﴿ 2﴾ ‏ اور جس نے (اس کا) اندازہ ٹہرایا (پھر اس کو) رستہ بتایا ‏﴿ 3﴾ ‏ اور جس نے چارہ اگایا ‏﴿ 4﴾ ‏ پھر اس کو سیاہ رنگ کا کوڑا کر دیا ‏﴿ 5﴾ ‏ ہم تمہیں پڑھا دیں گے کہ تم فراموش نہ کرو گے ‏﴿ 6﴾ ‏ مگر جو خدا چاہے۔ وہ کھلی بات کو بھی جانتا ہے اور چھپی کو بھی ‏﴿ 7﴾ ‏ ہم تم کو آسان طریقے کی توفیق دیں گے ‏﴿ 8﴾ ‏ سو جہاں تک نصیحت (کے) نافع (ہونے کی امید) ہو نصیحت کرتے رہو ‏﴿ 9﴾ ‏ جو خوف رکھتا ہے وہ تو نصیحت پکڑے گا ‏﴿ 10﴾ ‏ اور (بےخوف) بدبخت پہلو تہی کرے گا ‏﴿ 11﴾ ‏ جو (قیامت کو) بڑی (تیز) آگ میں داخل ہو گا ‏﴿ 12﴾ ‏ پھر وہاں نہ مرے گا اور نہ جئے گا ‏﴿ 13﴾ ‏ بے شک وہ مراد کو پہنچ گیا جو پاک ہوا ‏﴿ 14﴾ ‏ اور اپنے پروردگار کے نام کا ذکر کرتا رہا اور نماز پڑھتا رہا ‏﴿ 15﴾ ‏ مگر تم لوگ تو دنیا کی زندگی کو اختیار کرتے ہو ‏﴿ 16﴾ ‏ حالانکہ آخرت بہت بہتر اور پائندہ تر ہے ‏﴿ 17﴾ ‏ یہ بات پہلے صحیفوں میں (مرقوم) ہے ‏﴿ 18﴾ ‏ (یعنی) ابراہیم اور موسیٰ کے صحیفوں میں ‏﴿ 19﴾ ‏